Apustu etxearen aurkako ekimen iraunkorra abiatu du Elkar-ekinek

Atzo arratsaldean abiatu zen datozen asteetan luzatu asmo den apustu etxearen aurkako ekimen iraunkorra. Elkar-ekineko kideak izan ziren lehen txanda egin zutenak, eta datozen asteotan herriko hainbat taldek eta kuadrillak hartuko dute lekukoa. Sei laguneko elkarretaratzea egitea eta esku-orriak banatzea da mobilizazio iraunkor honen oinarria.\ \ Honakoa da atzo banatu zuten esku-orrian jasotako testua:\ \ AZPEITIAN APUSTU ETXERIK EZ\ \ \"Herrian apustu etxe bat ireki behar zutela jakin nuenean, barruak buelta eman zidan\".\ \ \"Lehenengo sari potoloa irabazten duzunean hasten dira ludopatiaren zantzuak\".\ \ \"Kirol munduaz ulertzen nuelako pentsatu nuen diru asko irabaz nezakeela apustu hauetan, baina diru asko galdu nuen\".\ \ \"Nire ingurukoei dirua eskatzen nien gezurrak esanez, apustuak egin ahal izateko\".\ \ \"Denaren gainetik jarri nituen apustuak, eta seme alabak galtzera iritsi nintzen\".\ \ Ez dira guk asmaturiko esaldiak, jokoarekin arazoak izan dituzten pertsonek emandako testigantza gordinak dira. Frogatua dago apustuetan dabilena luzera beti aterako dela galtzen, frogatua dago apustu etxeak beti aterako direla irabazten. Horretarako pentsatuta daude, herritarren kontura sekulako dirutzak irabazteko. Eta horregatik egiten dute hainbeste publizitate jendeak apustu egin dezan, jakin badakitelako jokatzera hurbiltzen den jendea galtzen aterako dela eta beraiek irabazten.\ \ Apustu etxeei ez zaie inporta jendea gaixotzea, jendeak familia galtzea, jendeak pobrezia egoeran amaitzea. Ez zaie inporta jendearen bizitza, beraiek dirua irabaztea guztiaren gainetik baitago.\ \ Horregatik, Azpeitiko apustu etxea sozialki baztertzeko deia egiten dugu, bertara ez joateko, herrian bakarrik eta isolaturik uzteko. Horretarako herritar guztion konpromisoa garrantzitsua dela pentsatzen dugu, gutako bakoitzak bertara joateari uko egin ezkero, apustu etxearen ondorio larriekin amaitzen lagunduko dugulako.