Trail eta ultra trail erako mendi lasterketetarako talde berri baten sorrera iragarri dute egunotan sare sozialetan. Domusa Teknik Team izenarekin, trail munduan lehiatzen diren "Euskal Herriko kirolarien aldeko apustua" egingo du Domusa Teknik 40MLK probaren bueltako dinamikatik "lagun talde baten ekimenez sortu" duten taldeak.
"Proiektua aurrera ateratzeko, indartuz joateko eta euskal trail mundua eraldatzeko ilusioz" agertu dira proiektuaren sustatzaileak. "Talde bat baino gehiago da, trail mundutik sortu den familia bat", diote. Domusa Teknik Teamen ariko diren kirolari batzuen izenak ere aurreratu dituzte: Aritz Egea urretxuarra –Domusa Teknik 40 MLK-ren lehen edizioaren irabazlea–, Borja Zubizarreta azkoitiarra eta Goar Lopetegi ibartarra dira jakinarazi dituzten lehendabizikoak. "Proiektuari forma ematen hasi ginenean ez genuen uste horrelako proiektu indartsua osatzea lortuko genuenik, baina oso harro gaude lortu dugun babesarekin eta, batez ere, korrikalariek erakutsi duten konpromisoarekin", adierazi dute talde sortu berriaren sare sozialetan.