Ireki dute berriro, azkenean, Errezil eta Bidania-Goiatz lotzen dituen errepidea. Atzo 05:00 aldera, garraio bereziko ibilgailu bat ez aurrera eta ez atzera gelditu zen GI-2634 errepidean, Errezilgo herrigunetik gora pare bat kilometrora dauden bihurguneetako batean, eta bidea erabat itxita gelditu zen. Kamioia ateratzera joan zirenean, berriz, horrek gainean zeraman hondeamakina irauli, eta makina hori gelditu zen Errezil eta Bidania-Goiatz arteko errepidean zeharka, pasoa oztopatuz.
Arratsaldeko azken orduetan, bi garabi handi joan ziren hondeamakina kentzera, eta Ertzaintzak Urola Kostako Hitzari jakinarazi dioenez, 04:00etan lortu dute, ia 24 orduz itxita egon eta gero, errepidea irekitzea.