Gipuzkoako Foru Aldundiak interes orokorreko xedeen esparruan lehentasunezko jotzen dituen jardueren zerrenda bat egiten du ekitaldi bakoitzean, eta baita jarduera horiek garatzen dituzten entitateena ere. Euskararen esparruko lehentasunezko jardueretan herri eta eskualde mailako euskarazko hedabideak sartzen ditu, eta tartean dira UKTren hedabideak ere: Guka, Azkoitia Guka, Azpeitia Guka, Zumaia Guka, Zarautz Guka eta Aia-Orio Guka.
Horiek horrela, Gukaren bazkideek 2024an egindako ekarpenaren araberako onura fiskala jasoko dute aurtengo errenta aitorpenean. Hau da, bazkideek egin zuten ekarpenaren %30 bueltatuko die ogasunak aurtengo aitorpenean.
Zerga onura jaso ahal izateko, Gukaren bazkideek ez dute ezer egin beharko; izan ere, UKTk dagoeneko igorri dizkio bazkideen datuak aldundiari, eta hark zuzenean aplikatuko die hobaria, NA zenbakia bat etorriz gero behintzat. Bazkideren batek ikusten badu dagokion hobaria ez diotela aplikatu, bazkide@ukt.eus helbidera mezua bidal dezake UKTk bere NA zenbakia baduen ziurtatzeko.