Konturatzerako iritsi zen, eta konturatzerako badoa. Gure Zirkuak gaur eskainiko du hamaikagarren eta azken emanaldia Azpeitian, ekaineko bigarren hamabostaldia herrian igaro ostean. Emanaldietarako sarrera guzti-guztiak agortu dituzte, eta izan da ikusi nahi baina ezinean gelditu denik. Ikusi duenak, berriz, gogotik gozatu du ikuskizunaz.
Azkenaurreko emanaldiaren aurretik zirkura bertaratu gara, artistek egonaldiaz egin duten balorazioa ezagutzeko. Ekain Ibarguren Gure Zirkuako kide azpeitiarra gustura agertu da zirkuak izan duen harrera ikusita.
Eguraldiak ez du askorik lagundu ekainean zehar, baina giro goibela eginagatik, Gure Zirkuaren magiak alaitu ditu bertaratu direnen egunak. Orain, Lekeitiok (Bizkaia) hartuko du Gure Zirkuaren bisita, Orion egingo dute abuztuko egonaldia, eta Azpeitia hurrengo aldiaren zain geldituko da.