Albistegia

San Inazio bigarrenez, 15. Bakailao Txapelketa egin dute Azpeitian. Epaimahaiaren iritziz, Ainhoa Olazabalek eta Ander Urbietak prestatutako bakailaoa izan da onena; beraz, haiek jantzi dute aurtengo txapela. Bigarren postuan, Aitor Expositok eta Janire Alkortak prestatutako bakailaoa sailkatu da, eta hirugarren, berriz, Mila Urangak eta Josu Mantzisidorrek prestatutakoa. Elkarte onenaren saria, bestalde, Izarraitz Txokok eskuratu du; Ignacio eta Iñigo izan dira soziedade horren ordezkariak. Gukak hainbat parte hartzailerekin hitz egin du, baita aurtengo irabazleekin ere. 

San Inazio eguna da gaur, eta eguerdira artean urterokoak diren ekitaldiak izan dira Azpeitian. Udal Musika Bandaren, Arrasateko gaiteroen eta Izarraitz txistulari taldearen diana izan dira gaur Alde Zaharreko kaleak esnatu dituena. Ondoren, Bandakoak eta txistulariak udal ordezkariekin batera plazatik parrokiara korporazioan joan dira. Segidan, prozesioa egin dute parrokiatik hasita, behin itzulitakoan meza nagusia izan da Parrokiako eta Julian Barrenetxea abesbatzek abestu dute eta Ignacio Arakistainek jo du organoa. Elizkizunak bukatutakoan, Lopene ganadutegiko bigantxak izan dira Done Jakue kalean eta Udal Musika Bandak kontzertua eskaini du Sanagustin kulturgunean.

Plaza arrosa kolorez jantzita eta Azpeitiko festa batzordeek botatako txupinazoarekin hasi dira 2026ko saninazioak, eta hiru egunez eta hiru gauz festak ez du etenik izango. Errebaleko eta Haujijijai batzordeetako kideek irakurri dute mezua, eta Landetakoek piztu dute suziria. Gainerako talde guztietako ordezkariak ere izan dira udaletxeko balkoian festei hasiera emateko. Nagore Alkorta alkateak han elkartutakoen lana eskertu du, eta gogoan hartu ditu munduan zehar askotariko sarraskiak jasan dituztenak eta herrian egon ezin dutenak. 

San Inazio jaietako egitarauaren barruan, 9 eta 12 urte bitarteko umeentzako izozki tailerra egin dute gaur Azoka Plazan, Azpeitiko Udalak antolatuta. Getariako Dona Doni dendako Fernando Alberdik izozki tradizionalak egiten irakatsi die bertaratu diren gaztetxoei. Aurrena, izotza gatzarekin hoztu dute, eta, ondoren, esnea eta azukrea baliatu dituzte izozkiak egiteko. Alberdirekin berarekin eta tailerrean parte hartu duten hainbat gaztetxorekin hitz egin du Gukak. 

Atzo arratsaldean izan zen errekortarien txapelketa zezen plazan. Harmailetatik begira jende ugari izan zen, eta atzokoan Eusebio Sacristan Use izan zen nagusi. Zezen Beltz saria, berriz, Vallek jaso zuen. 

Herritar ugari atera dira kalera, ohikoa den sagardoa eta txekor nahiz hegaluze erre pintxoak dastatzera. Gukak bideoan jaso ditu eguerdiko irudi hainbat, baita herritarren testigantzak ere.

Eguraldi ona egiten duen egunetan jende ugarik jotzen du aisialdi eremu horretara, eta egunotan ere ez da jenderik falta izan. Gukak herritarrei galdetu die zer iritzi duten eremuaz, txorroen gune berria ireki berritan.

Gaur goizean hasi dute Izarraizpe Open izeneko speedcubing txapelketa Azpeitiko Izarraizpe ikastola publikoan. Euskalcubing elkarteak eta Espainiako Speedcubing Elkarteak antolatu dute lehia, Mikel Manterola eta Ruben Lopez buru direla. Txapelketa gaur hasi badute ere, bihar ere izango du jarraipena; izan ere, igande arratsaldean jokatuko dituzte finalak. Guztira, 40 bat lagun ari dira txapelketan parte hartzen, eta horietako asko urrutitik etorri dira: Frantziatik, Portugaldik eta Espainiako hainbat txokotatik, besteak beste. Euskal hiztunak diren partaide batzuekin eta Mikel Manterola antolatzailearekin hitz egin du Gukak, txapelketaren nondik norakoak hobeto ezagutzeko.

Saharako 21 haur etorri dira Urola Kostara uda igarotzera; 11 harrera familietan daude, eta hamar Azpeitiko Ikasberrin atondu duten Bakeleku udalekuan.

2027ko San Sebastian bezperako danborradak itxura berria hartuko du. Ibilbidea mantenduko du, ez du geldialdirik egingo parrokian eta gauerdian danbor taldeak bi multzotan zatituko dira, hogeita lau plazan eta hamabi parrokian. Askotariko iritziak eragin dituzte plazako espazio faltari erantzuteko prozesuak nahiz hartutako erabakiek. Esaerak dioten bezala, zenbat buru, hainbat aburu. Horietako batzuk bildu ditu Gukak bideo honetan.

Gauerdian sartu dute lizarra Urrestillako plazan, eta sanjoanetan bete-betean murgildu dira hango herritarrak. Beroa bai, baina festarako gogoak lagundu du aitzakia hori alboratzen. 

Beroa. Hitz hori da egunotako protagonista nagusia. Beroa barrualdean, eta beroa, apalagoa bada ere, kostaldean. Baina nola daramate herritarrek beroaldia? Muturreko tenperaturei aurre egiteko erremediorik ba al dute? Guka kalera atera da erantzunen bila, eta bideo honetan dituzue herritarrek esandakoak.