San Sebastian egunean, urtarrilaren 20an, haurren danborradan aterako diren hamar taldeetako gaztetxoak prest daude danborren festan murgiltzeko. Gaur, ostegunez, egin dute hirugarren eta azken entsegua Izarraitz pilotalekuan. Pieza batzuekin beste batzuekin baino hobeto moldatzen dira, baina guztiekin ondo pasatzea dute xede.
Astelehenean, hilak 20, 12:30ean hasita egingo dute haurren danborrada Aranetik eta Artzubiatik irtenda, eta plazan amaituko dute, urtero bezala. Egun horren aurretik, ordea, ikasleek izango dute danborradaz gozatzeko aukerarik. Lehen hitzordua bihar arratsaldean dute, ikastetxeetako danborradetan.