Euskal Sagardoa jatorri izeneko hainbat sagardo dastatzeko aukera izan zuten atzo Iturri elkartean, Azpeitiko Udalak Gipuzkoako Sagardogileen Elkartearekin antolatutako dastaketa zikloaren hirugarren hitzorduan.
Oilo-Soron eta Basazabalen egindako dastaketa saioei bezala, sagardozaleek harrera ona egin zioten atzokoari ere. Gipuzkoako Sagardogileen Elkartekoek aukeratutako sei sagardo mota dastatu eta bakoitzaren gaineko xehetasunak ezagutzeko parada izan zuten Iturriko mahaien bueltan elkartutakoek, Telmo Iruretagoienaren eskutik; eta, nola ez, Iturri elkartekoek prestatutako afariarekin borobildu zuten iluntzea.
Euskal Sagardoaren dastaketa zikloa osatzeko gelditzen diren bi hitzorduak datozen bi ostegunetan izango dira:
- Maiatzak 29: Zokoa elkartean
- Ekainak 5: Gure Ametsa elkartean.
Iturri elkartean atzo dastatu zituzten sagardoak. (Utzitakoa)