Mantangorriren jaitsiera, bideoan

Atzo arratsaldean Mantangorri jaitsi zenetik, festa giroan murgilduta dabiltza Azpeitiko Sanjuandegi auzoan. Ekitaldi nagusiaren aurretik, Bilboko hilketa matxista salatzeko elkarretaratzea egin zuten, baita Palestinari elkartasuna adierazteko argazkia atera ere. Ondoren, balkoitik behera jaitsi zen auzoko festen irudi bilakatu den animalia, eta jendetza bertaratu zen ekitaldia bertatik bertara ikustera. Ondoren, berriz, buruhandiek eta trikitilariek alaitu zuten auzoa. Han bildu ziren herritar batzuekin hitz eginda osatutako bideoa da honako hau.