Datorren igandean zortzi, uztailaren 27an, ospatuko da aurtengo Umeen Eguna. Santio egunaren eta saninazioen arteko zubia izango da aurten egun hori, eta urtero bezala, baita Euskal Herriko erraldoi eta buruhandi konpartsa ugariren topagune ere.
Aurten, hogei konpartsa elkartuko dira Azpeitiko kaleetan, eta horietako bat izango da desfilean hirugarren urtez jarraian parte hartuko duen Urrestillako erraldoi txikiena. Umeen Egunekoa ez da edozein moduko hitzordua, eta egun horretan erraldoiak behar bezala dantzatzeko prestaketa lanetan murgilduta dabil dagoeneko Urrestillako erraldoien konpartsa. Soreasuko kulturgunearen atarian elkartzen dira entseguak egiteko, txistu, pandero eta guzti. Saio batzuk egin dituzte dagoeneko; horietako azkena, gaur bertan.
