Azpeitiko Udalak jaien eraginez trafikoan, aparkalekuetan eta zenbait eremutan izango diren aldaketen berri eman du. Aparkalekuei lotuta, ohi bezala, Izarraizpe eta Iraurgi ikastetxeetako atarietan aparkatzeko aukera izango dute herriaren erdigunera joan nahi duten ibilgailuek. Hain justu, gaurtik eta festak amaitu arte irekiko dituzte bi eskola horietako atariak ibilgailuentzat. Ordea, Perdillegiko jolastokia berritzen ari direla eta, aurten ez da gune horretan aparkatzerik izango.
Trafikoari dagokionez ere izango dira aldaketak. Batetik, bihar itxiko dute Foru Ibilbidea, eta ondorioz, Julian Elortza kaleko eta Burdinbidearen Euskal Museoaren alboko autobus geralekuak bertan behera utziko dituzte. Bestetik, ibilgailuek ezin izango dute hartu Jose Artetxe kaletik Paulo VI. auzunera. Barraken bueltan "jende asko" ibili ohi delako hartu du neurria udalak. Hori hala, saninazioetako hiru egunetan itxita egongo da bide horretatik pasoa.
Horrez gain, San Inazio bezperan eta San Inazio egunean itxi egingo dute Izarraitz Ateko ur txorroen eremua, bi egun horietan su artifizialak botako baitituzte inguru hartatik. Dena den, udalak gogorarazi du bestelako ekitaldi batzuek edo unean uneko jende pilaketek ere izan dezaketela eragina trafikoan.