Aste honetan jarri dituzte saltzen Zezen Beltz elkartekoek Azpeitiko Errekortari Txapelketa Nagusirako sarrerak. Hilaren 25ean jokatuko da lehia Azpeitiko zezen plazan, 18:00etan hasita. Atzo arratsaldean sarrerak saltzeko mahaia jarri zuten plazako arkupeetan, eta gaur ere ipiniko dute 12:00etatik 14:00etara. HIlaren 24an, plazan, 18:00etatik 19.30era egongo dira Zezen Beltzekoak sarrerak saltzen, eta txapelketaren egunean, hilaren 25ean, Goiko kalean, Egaña gozotegiaren ondoan, 12:00etatik 14:00etara.
Gainontzean, dagoeneko sarrerak salgai jarrita dituzte Azpeitiko eta Azkoitiko hainbat tabernetan: Azpeitian, Pastorkua, Mendizabal, Berdie, Jim Clark, Eguzkitza, Etxe Zuri eta Kantoi tabernetan, eta Azkoitian, Elurren. Txapelketaren egunean, zezen plazako leihatilan ere sarrera erosteko aukera izango da.
Errekortari Txapelketa Nagusiaren sarreren prezioak, berriz, honakoak dira. 0-4 urte artekoentzako doan izango dira. Zenbakitu gabekoak 5-14 urte bitartekoentzat 12 euro balioko dute eta 15 urtetik aurrerakoentzat 18 euro. Zenbakitutako sarrerek, berriz, 25 euro balioko dute.