Aitortzak, sariak eta kritika onak pilatzen jarraitzen du Nagore Aranburu aktore azpeitiarra protagonista duen Querer telesailak. Telesailen jaialdirik garrantzitsuenean lehiatuko da orain Alauda Ruiz de Azua zinemagilearen lana; Lilleko (Frantzia) Series Mania jaialdiko sail ofizialean, zehazki. Martxoaren 21etik 28ra egingo dute jaialdiaren aurtengo edizioa.
Munduko hainbat txokotan ekoiztutako beste zortzi telesailekin lehiatuko da Querer: Empathie(Kanada), Generations(Danimarka), Hal & Harper (AEB), Kaboul (Frantzia-Alemania-Italia-Belgika-Grezia), Long Bright River (AEB), Mussolini: Son of the Century (Italia-Frantzia), The Deal (Suitza-Frantzia-Luxenburgo-Belgika) eta The German (Israel-AEB).
Querer lana Donostiako Zinemaldian estreinatu zuten iaz, eta sari ugari bildu ditu harrezkero. Izan ere, hiru Forque eta bi Feroz sari jaso ditu telesailak, eta Aranburu ere bi jaialdietan saritu dute. Bikote barruko tratu txarrak eta sexu abusuak dira telesailaren ardatza, eta Movistar Plus plataforman ikus daiteke.