Atzo, San Joan bezperaz, suziria botata hasi zituzten sanjoanak Urrestillan. San Joan suari lotutako festa, berriz, gauerdian egin zuten. Herritar gazteek lizar enbor luze bat sorbaldetan hartu eta kalejira egin zuten trikitilariek lagunduta, eta ohi bezala, eliza aurrean sartu zuten. 25 minutu inguru behar izan zituzten enborra zuzen eta behar bezala kokatzeko; izan ere, eskailerak hartuta, lizar enborra zuloan sartzeko bultzaka aritu ziren zenbait lagun.
Enborra sartuta, festa frontoi aurreko aparkalekuan hasi zen gero. Egur pila batekin osatutako tontorrari su eman, eta dantzan murgildu ziren urrestildarrak eta hara joan ziren gainerako lagunak.
