Uztailean jakin zen Azpeitiko Parrokia utzi eta Zarauzkoaren ardura hartuko zuela Kepa Susperregik. Ezustean iritsi zitzaion aldaketa 31 urtez Azpeitiko Parrokian aritu den elizgizonari, eta ezusteko handia izan zen albistea herritarrentzat ere. Hori horrela, agur bikoitza jasoko du Susperregik asteburuan, baina biharko eta etzirako antolatutako ekintzen bezperan, Azpeitiko Udalak ere agurtu nahi izan du hiru hamarkada pasatxoan Azpeitiko erretore izan dena.
Hain zuzen ere, udaletxean izan da gaur Susperregi, eta Nagore Alkorta alkatearekin nahiz Idurre Zabaleta, Mikel Odriozola eta Ander Larrañaga zinegotziekin elkartu da. Udalak "urteotan herritarrekin izandako gertutasuna eta laguntzeko izan duen prestutasuna" eskertu dizkio, eta "zorte ona" opa dio etapa berrirako.
