Lagun Onaken gizonen talde nagusiak abuztuaren 2an hasi zuen denboraldi berrirako prestaketa, eta hilaren 10etik denboraldiaurreko hiru lagunarteko jokatu ditu. Laugarrena eta azkena jokatuko dute zapatuan, abuztuaren 31n, Durangoren kontra, 11:00etan, Garmendipen.
Ohorezko Erregional Mailan ari den Tolosaren kontra 1-0 irabazi zuen Lagun Onakek hilaren 10ean jokatutako lagunartekoa. Abuztuaren 17ko Eibar B-ren kontrakoa, ordea, 1-2 galdu zuen Azpeitiko taldeak. Eta abuztuaren 24an, Ugaitz Kerejetaren oroimenez, Realaren gizonen hirugarren taldearen kontra jokatutakoa ere galdu egin zuen Lagun Onakek 2-3.
Irailaren 8tik liga
Irailaren 8an hasiko da liga Hirugarren Mailan, eta Lagun Onakek Derioren kontra jokatuko du lehen jardunaldian, Garmendipen. Jose Luis Riberak gidatzen duen taldea erabat berritutakoa da. Izan ere, 2023-2024 denboraldian Azpeitiko taldean aritu ziren jokalarietatik hamahiruk utzi dute taldea, eta bostek bakarrik jarraitzen dute 2024-2025ean: Andoitz Amenabar, Lander Izagirre, Aner Gomez, Xabi Gereta eta Jagoba Erdozia dira taldean gelditu diren bostak.