Alex Aizpuru Kaxe futbolaria (Azpeitia, 1994) Amorebietan ariko da datorren denboraldian. Bizkaiko klubak atzo eman zuen fitxaketaren berri. Aurrelariari ez zaio arrotza taldea; izan ere, joan zen denboraldian, urtarrilean Sestao Riverrera joan aurretik, hainbat astez Amorebietarekin entrenatu zuen, belauneko lesio baten ostean pixkanaka lanean hasteko.
Kaxe hainbat klubetan aritu zen –Lagun Onak, Vitoria eta Beasain– Galiziako Rapido de Bouzas taldeak fitxatu aurretik; 2017-2018 denboraldian joan zen hara, neguko kanpainan, Beasainekin hamabost partidatan hamahiru gol egin ostean. Sasoi erdia Galiziako taldearekin egin ostean, Bahraingo East Riffa taldearekin aritu zen azpeitiarra, baina 2019ko urtarrilean Ponferradinarekin itxi zuen akordioa; hilabete batzuk geroago, Espainiako Bigarren Mailara igotzea lortu zuen taldeak. Bigarren Mailan ia ehun partida jokatu ditu Kaxek, Ponferradinarekin aurrena, eta Ibizarekin ondoren. Tartean, Sabadell eta Mallorcako Atletico Balear taldeekin aritu da, Lehen RFEF mailan, eta maila horretan bertan arituko da aurrerantzean Amorebietarekin ere.