Urtarrilaren 22an hasi eta maiatzaren 12ra arte, hilean hitzaldi bana eskainiko dute Basazabal jauregian, Naziogintza taldeak antolatutako Euskara bidegurutzean zikloaren baitan. Adituen eskutik, euskarak egun bizi duen egoerari buruzko erradiografia egingo dute eta hizkuntzak dituen erronkak, aukerak nahiz mehatxuak aletuko dituzte bost solasaldietan. Larrialditik pizkunderako bidea egiteko proposamenak jasotzeko helburua du ekimenak.

Martxoaren 28an, larunbatez, egingo ditu 24. Korrikak euskararen aldeko urratsak herrian. Duela bi urte ez bezala, arratsalde erdiko orduetan igaroko da AEKren egitasmoa herritik. Errezildik iritsiko da Korrika Azpeitira, Zestoara joko du gero, eta handik bueltan, Azpeitira hartuko du berriro bidea, Azkoitia aldera zuzentzeko.