Efemerideak

• 1730-5-2. Gauean iritsitako Bergarako herriak idatzitako gutunari erantzutea erabaki zuten. Gaueko hamaikak igaro ondoren osatu zen zerrendan agertzen ziren 14 bat mandazain Mallorkako Bataloiari laguntzera joango zirela erantzun zuten. Baina mandazainek kexa agertu zuten azkenaldian herritik tropa bat pasatu zenean ordainketa kaskarra egin zietela-eta; beraz, hiru egun aurrez ordaintzea eskatu zuten. Herriak erabaki zuen Frantzisko Etxeberria bertara bidaltzea, gutun batekin, hiru eguneko soldata aurreraturik ordaintzea eskatuz, eta komisarioari ganaduak ondo zaindu eta tratatzeko eginkizuna zuela jakinaraziz.
• 1730-4-22. Joxe, Domingo eta Bartolome Goenagaren aldeko sententziaren berri eman zuten. Epaiak herriko agintaritzara iristeko eskubidea zutela agertu zuen, nahiz eta herriak aurrez ukatu.
• 1730-3-12. Ugarte burdinolako hauspoak egiteko herriko basoetan egurra ebakitzeko baimena eman zioten Gaspar Zuloagari.
• 1730-3-12. Herriak erosita zuen garia erabiltzea agindu zieten ogia egiten zuten emakumeei, eta ez beste nonbaiten erositakoa. Agindua betetzen ez zuenari dukat bateko isuna ezartzeko prest zen herria.
• 1730-2-12. Izarraizko izoztegia alokatzea erabaki zuten.
• 1730-1-31. Ondoren sukaldeetarako banaketa egiteko zenbat egur zegoen jakitea erabaki zuten.
• 1730-1-21. Iruñeko apezpikuari baimena eskatu eta parrokirako aulkiak egitea erabaki zuten. Elizak ordaindu zituen.
• 1730-1-21. Gallai baserrian zen maizterrari eskatu zioten behar zen urruntasunarekin Azpeitiak eta Zestoak zituzten mugarri bakoitzaren ondoan gaztainondo bat landatzeko. Gaztainondoak haztean mugarriak aurkitzeko lagungarri bihurtu ziren.
• 1730-1-5. Behartsu hil zen Lukas Arsuaga udaltzainaren elizkizunak ordaintzeko, 120 erreal ematea erabaki zuen herriak.
• 1730-1-5. Bernardo Eizagirre pregonariari eginiko janzkia ordaintzeko, 272 erreal eman zituen herriak.
• 1729-11-25. Sagardoa salgai jartzeko zozketa egin zuten, eta txandak izendatu zituzten.
• 1729-11-25. Antonio Kortak, Legorretako etxean konponketa lanak egiteko, egurra ebakitzeko baimena eskatu zuen, eta baiezkoa eman zioten.
• 1729-11-11. Antonio Odriari egurra ebakitzeko baimena eman zioten, Arizpe bere etxea egokitzeko, hondamenean zelako.
• 1729-11-4. Jakinean izanik nolako prezioa zuten behi eta ahari haragiek inguruko herrietan, agintariek hurrengo lehen larunbatetik aurrera batarena eta bestearena zerbait altxatzea erabaki zuten, eta pregonariaren bidez zabaldu zuten albistea. Eskribauari, berriz, agindu zioten haragiaren hornikuntza egiten zuenari -Joan Larralderi- esatea herriarekin eginik zeukan eskritura osorik bete beharko zuela, zigorrik jaso nahi ez bazuen, hil behar zituen idiak sokarekin loturik enparantzara ateraz.
• 1729-11-4. Kalteak sortzen zirela kontuan izanik, pregonariaren bidez zabaldu zuten herri barruko inork, aurrez herriko agintarien baimenik lortu gabe, ezingo zuela txerririk erosi hazteko asmoz.
• 1729-10-30. Nafarroako ardoaren urtebeterako hornikuntza egiteko eskritura sinatu zuten Juan Lizarraga, Martin Peruzurgin, Juan Guillen, Baltasar Gorritxo eta Miguel Lizarraga nafarrekin eta herriko Domingo Goenagarekin, guztiak bat eginik eta hutsunerik gabe herriaren beharrak bete zitzaten.
• 1729-10-21. Herriak 1723an idatzitako gutunari erantzunez, Diego Alzajak Liman aurreko urteko urriaren 20an sinatutako gutuna irakurri zuten, esanez parrokiko erretaula nagusia urreztatzeko egindako diru eskaintza berekin izango zuela berehala. Eskerrak ematea erabaki zuten.
• 1729-10-21. Herriko etxe batzuk hondamenean zeudenez -arriskuan, gainera-, Inazio Segurola zurginari eta Joseph Lizardi harginari eskatu zieten txostena aurkezteko, herriaren aldetik neurriak har zitezen.
• 1728-9-7. Sevillan (Espainia) ziren Elolaren juroak, erreal zedula baten bidez Granadako Gatzagara aldatu zituzten.
• 1727-4-28. Joxe de Ripa maisuak Antonio Balzategik parrokirako egindako organoa ikusi zuen, eta horri buruzko txostenaren berri eman zuten.
• 1725-1-8. Frantzisko Ibero jaio zen. Haren aita Inazioren ofizioari jarraitu zion, arkitektu bezala. Loiolan egin zituen urte batzuk eta, Ventura Rodriguez arkitektuak proposatu moduan, herriko parrokiko ataria egiten aritu zen. Harenak ziren Elgoibar, Usurbil, Hondarribia eta Andoaingo dorreak, baita Donostiako Santa Maria parrokiko ataria ere. Tolosako Santa Maria elizan eta Azkoitiko parrokian ere egin zituen lanak, beste zenbait tokitan bezala. Azpeitian hil zen, 1795ean.
• 1720-7-19. Alkateak Simon Elgorriaga Donostiara erregearen galeratara eramateko ordaindutako gastuak aurkeztu zituen. Simon Elgorriaga Baionako komandantearengana eraman zuten ondoren, sei urteko zigorra ezarri baitzitzaion.
• 1720-5-8. Parrokiko erretorearekin bat eginik, bertako organojolearen falta adierazi zuten. Unean Madrilen zegoen Joakin Korta herritarra izendatu zuten organojole kargurako, apaizaren aldetik. Herriari ezinezkoa egiten zitzaion hari ordainketa egiteko apezpikuaren baimena lortzea, zati bat Alcañicesko Markesak eskaintzen ez bazuen behintzat. Herriak udalbatzar nagusi bat egitea erabaki zuen gaiari buruz erabakia hartzeko.
• 1720-3-2. Parrokiaren atzean zen hezur tokian eginiko obrak onartu zituzten, toki berean margotutako Andre Mariaren irudi bat jarri zela esanez, bere marko eta guzti.
• 1719-12-1. Bailaran garia urri zela ikusita, Gaztelako (Espainia) presidenteari idatzi baten bidez baimena eskatzea erabaki zuten, Andaluziatik (Espainia) 1.550-2.000 anega inguru ekartzeko.
• 1719-12-1. Egun horretan egindako batzarrean, Juan Lizarraga, Juan Guillen, Juan Larraza eta Martin Perusurgin mandazain nafarrak batetik, eta, bestetik, Diego Larrazaren ordez haren anaia Antonio Larraza, Azpeitiko Joseph Olarra eta Pedro Irezabal mandazainak agertu ziren. Guztiek adostasuna azaldu zuten, aurreko urtean egin bezala eta diru ordain beraren truke Azpeitiko ardo hornikuntza egiteko. Hots, urte osoko ardo nafarra, gorria eta txakolinaren hornikuntza egitearen truke zilarrezko zortzi zituen berrehun errealen ordain saria.
• 1719-10-27. Donostiara joan ziren hiru konpainietako ofizialei ordaindu beharrekoa erabaki zuten.
• 1719-10-20. Frantziarren aurkako azken gerratean Donostiari laguntzera bidalitako herritar soldaduen kontuak ikusi ondoren, hilaren 22ko Herri Batzar nagusian horren berri ematea erabaki zuten.
• 1719-9-8. Herrian ziren hiru konpainiatako soldadu zaurituekin botikatan eginiko gastuak ordaintzeko, Ansoategi erregidoreari agindu zioten tasatu eta botikariari ordainketa egiteko.
• 1719-9-8. Herritar batzuekin harremanetan jarri ondoren, alkatea izendatu zuten erabaki zezan zenbat ordaindu behar zieten parrokiko apaizei, meza nagusiekin eta prozesioekin errogatibak egin zituztelako Frantziako indarrek Hondarribiko hiria setiaturik eduki zuten garaian.
• 1719-7-16. Ormaetxe baserrian zen haur utzia, Blas Etxanizen emazteari ematea erabaki zuten, hazi zezan.
• 1719-6-29. Diputazioak agindu zuen gerrarako euren armekin prest egon behar zutela herritar eta biztanleek, eta horrela adieraztea erabaki zuten.
• 1719-6-26. Donostian zeuden herriko hiru konpainietako kapitainek dirua, ogia eta ardoa eskatu zuten. Herritar bereziei deitu zieten gaiari buruz hitz egiteko, eta zilarrezko berrehun ezkutu, lau zama ogi eta beste bi zama ardo bidaltzea erabaki zuten.
• 1719-6-18. Soldaduen soldatak erabaki zituzten Azpeitia eta Azkoitiak. 150 soldadu azpeitiar zeuden Donostian Santa Klara irlan, hiru konpainietan.
• 1719-6-15. Gerrako Diputazioaren albistea jaso zuten. Bertan erregeak Tolosara iristear zirela esaten zen eta hornikuntzek ongi eginda egon behar zutela. Ardo eta haragia hornitzen zuten herriei albistea pasatzea erabaki zuten, behar zen guztia ekartzeko, 50 duketako isunarekin.
• 1719-5-27. Frantziako tropak barnean zirela eta azken bi hilabetean probintzia zer egoera larrian zen ikusirik, bederatziurren bat, errogatibak eta kaleetan prozesioa egitea erabaki zuten.
• 1719-5-14. Izarraitzen eta Azpeitiko lurretara kanpoko ardiak ekarri zituztela esanez idatzi zuen Azkoitiko herriak, bi herrientzat kalteak sortzen zituztelako. Kanpoko artzainak erabiltzen zituzten txabolak botatzea erabaki zuten, bertako artzainenak bakarrik utzirik.
• 1719-5-6. Herriko Artxiboan zeuden herritar eta biztanleen 40 eskopeta eta gehiagoren konponketa ordaindu zuen herriak.
• 1719-5-6. Herritar soldaduz osatutako konpainia kanpoan zegoen eta, bere kapitainak laguntza eskatu zuenean, zama bat ardo eta beste zama bat ogi bidaltzea erabaki zuen herriak.
• 1719-4-21. Herriak osatu behar zituen hiru soldadu konpainien buruak izendatu zituzten.
• 1719-4-7. Loiolako eliza, gangari heldu behar zioten arkuetaraino altxatuta zegoen, eta Sebastian Lekuona obrako maisutzan hasi zen.
• 1719-3-25. Herriak Urbieta baserriari erositako lurraldeak harresi batez zeharkatzea erabaki zuten, bertan eraiki baitzuen teilari berria.
• 1719-3-25. Eskritura bat egitea erabaki zuten teilari bat edo gehiagorekin, herriaren teilari berria alokatzeko.
• 1719-3-25. Frantzisko Joseph Enparanek idatzitako gutuna irakurri zuten, bere enplegu berriari buruz albistea emanez; Hondarribia hiriko brigadier eta komandantea zen, Espainiako erregeak izendatuta. Herriak hura zoriontzea erabaki zuen.
• 1719-3-25. Herriak, Jazinto Etxeberria eskultoreak amaituta zuen parrokiko organoaren kaxa ikusteko, maisu aztertzaileak izendatu zituen.
• 1719-3-24. Hil haren 27an, astelehenez, 18 urtetik 60 urte bitarteko gizaseme guztiak armak zituztela goizeko bederatzietarako enparantza nagusian izan zitezen deialdia egitea erabaki zuten, 50 errealeko isunaren azpian, eta haien artean eta ahal bazen ezkongabeen zerrendatik, 150 soldaduren zozketa egiteko. Orduan bertan aukeratu zituzten bi lehen konpainietarako ofizialak.
• 1719-3-17. Gerrarako prest izateko albistea jasota, eta ikusita alkatea nahiko gaixorik eta zahartua zela, haren ordez kapitain bezala Frantzisko Inazio Alzibar aukeratu zuten.
• 1719-1-28. Diputazioaren aginduak bete nahian eta herritar bereziekin eginiko udalbatzarrean, Frantzisko Tomas Azkue eta Tomas Inazio Korta izendatu zituzten herriratzen ziren erregearen soldaduei ongi-etorria egiteko.
• 1719-1-27. Legazpi eta beste zenbait herrirekin osatutako elkartearen berri eman zuten, zerbait gertatzen zenean laguntza aurkitu nahian. Fidelari ahalmena eman zioten une horietarako 80 gizonezko armatu prestaturik izan zitzan.
• 1719-1-24. Diputazioaren eskaerari erantzunez, jatorrizko herritarren eta biztanleen zerrenda egitea erabaki zuten.
• 1719-1-22. Organo berria amaitzear zegoelako, parrokiko etxezain eta apaizak herriari organojole edo organista bat izendatzeko eskatu zioten.
• 1718-10-12. Eskribauari agindu zioten parrokiko apaizei eta beste zenbait herritarrei albistea pasatzeko -egun batzuetan behintzat, salketarik ez egiteko-, zurrumurruak zirelako frantziarrek probintzian sartzeko asmoa zutela ziotenak.
• 1718-9-23. Herriko diruzainari agindu zioten utzitako bi haur haziko zituzten emakumeei dobloi bana emateko, haurrentzat arropak eros zitzaten.
• 1718-8-14. Joxepa Oñatibia, herriko fidela eta bere semeari erosi zieten lurraldean, teilari berria egiteko etxe berri bat eraikitzea erabaki zuten, ahalik eta gastu txikiena egin nahi baitzen. Eta herritarrei materialak garraiatzen laguntzeko erregutu zieten, herriaren onerako izango baitzen.
• 1718-7-27. Inazio Segurola maisuak Buztinzuloetan, Urbieta etxe inguruan, teilari berria egiteko aukeratu zuen lurraldea erostea erabaki zuten.
• 1718-6-13. Derrigorrezkoa ikusten zuten bide publikoen konponketa. Bide horiek agintarien artean banatzea erabaki zuten, konponketen arduradunak haiek izan zitezen.
• 1718-6-13. Usandain putzua garbitzeko Izarraitz auzoan bizi zirenei eta bertan ganaduak zituztenei deitzea erabaki zuten. Deialdia elizaren bidez egingo zen eta uko egiten zionak sei errealeko isuna ordaindu beharko zuen.
• 1718-6-12. Juan Apaeztegia eta Inazio Bazasabalek adierazi zuten Buztinzuloetan aurkitutako lurrarekin eginiko teila eta adreiluak nahiko egokiak zirela eta urteetako lurra zegoela. Inazio Segurolari agindu zioten tokia ikusteko, ondoren Joxepa Oñatibia jabearekin harremanetan jartzeko.
• 1718-5-30. Olioaren hornikuntza egiten zuen Pedro Olarteri 25 libra olioko isuna ezartzea erabaki zuten. Olartek baimenik gabe saldu zuen. Beste hainbesteko isuna jarri zioten, saltzea debekaturik zegoelako, txarra baitzen.
• 1718-3-18. Buztinzuloeta inguruan labekada bat teila egitea erabaki zuten, horrela jakin nahian bertako lurra egokia zen edo ez teilak egiteko, eta ona baldin bazen herriko teileria bertan egiteko.
• 1718-3-13. Kutxirain deituriko tokian ebakiko zen sukaldeetarako gurdi egurra erreal baten truke saltzea erabaki zuten, nahiko urruti zegoelako, eta bide txarra, gainera. Diruzainak emandako txartelarekin agertu beharko zuten egurra nahi zutenak asteazkenetik aurrera aipatutako tokian.
• 1718-2-13. Burdinoletako jabeen eskaerari erantzunez, herriak ikatza egiteko bere mendiak saltzea erabaki zuen, baina sukalde eta labeetarako egurra erreserbatu zuen.
• 1718-2-9. Nahastu gabeko sagardoak saltzeko denbora jarri zuten: upelean zen edaria egiteko behar izan zituzten kuebano izeneko neurria hainbat eta beste lau egun gehiago.
• 1717-12-5. Agustin Beriztaini eskerrak eman eta oparia egin zioten, herriarentzat ardo pitxar bakoitzeko maraiko bi laurdeneko luzapena lortu zuelako erregearen aldetik.
• 1717-12-2. Azkoitian bizi zen mugaz bestaldeko Frantzisko Ibarrondorekin eskritura sinatzea erabaki zuten, hurrengo urteko martxoaren 1ean hasita eta bi urtean herrian behar adina teila eta adreilu egiteko. Mila teila 63 erreal eta adreilua 50 erreal ordaindu zituzten.
• 1717-4-2. Aste Santuan saldu zuen olio txarra gogoan izanik, eta egiten zituen hutsuneak kontutan izanik, olioaren hornitzaileari bi dobloiko isuna ezartzea erabaki zuten.
• 1716-12-23. Urteko sagarrarekin eginiko sagardo garbiak saltzea onartu zuten, denbora emanez jabeei horrela egiteko. Upela bat sagardo egiteko behar izan zituzten kuebano edo neurriak hainbat egun eta bi gehiago emango zizkion bakoitzari herriko fidelak epea amaitzean, eta beste upela txandari jarraituz saltzen jartzeko aginduko zuen.
• 1716-10-2. 14:00ak bitartean azokan janaria erostea debekatu zieten berriro saldu nahi zutenei.
• 1716-7-26. Herriko diruzainaren eskuetan San Agustin komentuari bertako lanak egiteko agindutako 600 ezkutu ordaintzeko ehun baino gehiago ez zeuden eta, beraz, dirua aurreratu zuten herriko mendien erosleei beste hainbeste itzultzea erabaki zuten, beste zerbaiterako izendatuta zen dirutik.
• 1716-6-13. Joseph Iturriagari baimena eman zioten Antxieta burdinola egokitzeko. Herriaren basoetan egurra mozteko ordaindu zioten.
• 1716-5-24. Teila eta adreilua egiteko bost labekada erretzeko egurra eman zioten herriko basoetan Loiolako Ikastetxeko prokuradoreari.
• 1716-5-10. Korrejidoreak hilaren 13an herriratuko zela aurreratu zuen, bere ohiko txanda betetzera.
• 1716-4-26. Juan Bautista Garmendiak, Egibar-handia baserriaren derrama -garaiko zerga- kobratzeko eskatu zuen.
• 1716-3-26. Kexa ugari jaso zuen Udalak, unean saltzen zen sagardo upelak 26 egunetik gora zituelako salgai jarrita eta, beraz, edari txarra zelako. Fidelari askatasun osoa ematea erabaki zuten, iruditutako neurriak hartzeko.
• 1716-2-28. San Agustingo obrarako, karobi bat erretzeko, herriaren basoetan otea ebakitzeko baimena eman zioten Sebastian Legardari.
• 1716-2-28. Alkateak Enparan zubian aurkitutako utzitako haurra bataiatzea erabaki zuen, aitabitxi bera izanik.
• 1716-2-28. Eskribauari hiru ezkutu ordaintzea erabaki zuten, Errezilera joan eta Antonio Aginagalde eta sendiari buruzko kaparetasunari buruzko sekretu langintza egin zuelako.
• 1716-2-19. Ohiko erronda egiten ari zela, alkateak utzitako haur bat aurkitu zuen Enparan zubian, eta Juan Pomianoren etxean utzi zuen, hazi zezaten.
• 1716-2-17. Herritar bereziekin egindako udalbatzarrean, Alcañicesko Markesak zuen parrokiko jabetasuna edo patronatuari buruz abokatuek zuten iritzia eman zuten ezagutzera, ahalmena izanik horrela hango apaizak izendatzeko. Bide guztiak jorratzen jarraitzea erabaki zuten, ahalmen hori herriak eskura zezan. Orduan Antonio Leon Enparan herritarra izendatu zuen markesak, eta haren aurka pausorik ez ematea erabaki zuten bildutakoek.
• 1716-2-16. Udalbatzar nagusian, Agustin Agirre eta Loiolako Ikastetxe Errealeko erretore Xalbador Rivadeori agertzea erabaki zen, parrokiko elizgizonak eta Alcañicesko Markesaren artean eginiko akordioaren hirugarren kapituluari buruz sortutako zalantzaren aurrean haiek sentitzen zutena ager zezaten.
• 1716-2-16. Bere fidatzaile bezala Antonio Larraar, Frantzisko Sagastume eta Antonia Aketegi izendatu zituen Lazaro Iturraldek. Honekin eskritura egitea erabaki zuten, Enparan errota alokatu ziotela adieraziz.
• 1716-2-5. Antonio Balzategi organo egilearekin parrokirako organoa egiteko eskritura sinatu zuten.
• 1716-1-26. Gaixotasuna kontuan izanda, ontzat hartu zuen herriak, udalbatzar nagusian, Juan Inazio Tornay sendagilearen dimisioa. Beste sendagile bat herriratu artean, bere lanean jarraituko zuela adierazi zuen Tornayk, deitzen ziotenean gaixoei bisita eginez. Ahalik eta azkarren sendagile bat herriratzeko agindua eman zieten Manuel Altunari eta Karlos Joakin Aztinari, kontuan izanik horrelako kasuetan beti euskaldunari lehentasuna eman izan zaiola.
• 1716-1-25. Herriko sendagile Juan Inazio Tornayk, gaixorik zela esanez, herriari bere ordezko bat aurkitzeko eskatu zion, ezinezkoa egiten baizitzaion bere lana behar bezala betetzea.
• 1715-12-9. Izarraizko izoztegia errentan eman zioten lau urterako Bartolome Larraari, herriaren elur hornikuntza urteko hogei dukaten truke egitearren. Elur libra hiru maraitan eta San Inazioren zortziurrenean lau maraitan saltzeko baimena lortu zuten.
• 1715-11-1. Apezpikuak agindutako obrak parrokian egiteko herriak izendaturik zituen Frantzisko Joseph Enparan eta Joseph Iturriaga, baina Manuel Alzaga alkateak eta Martin Saloguen erregidoreak adierazi zuten parrokiko organo berria egiteko aurrez eskritura sinaturik zutela Antonio Balzategi arkitektu eta organo-egile oñatiarrarekin, eta Felipe Uzkudun eskribauaren aurrean eginiko eskrituran jasotzen zela guztiaren berri.
• 1715-10-27. Ahotsa eta botoa zuten herritar guztiei, Eguberri egunera bitartean euren ondasunen berri herriko agintariei agertu beharko zietela agindu zieten.
• 1715-10-27. Manuel Alzaga alkatea eta Martin Saloguen erregidoreari eman zieten ahalmena herriaren izenean. Parrokiko erretorea, Joseph Itirriaga eta Joseph Enparan ere partaide izan ziren, azken bisitaldian apezpikuak organoari buruz emandako agindua betez, horretarako behar ziren eskriturak sinatuz eta gestioak eginez.
• 1715-10-27. Herri barruan txerriak haztea nahi zutenek hurrengo egunerako udaletxean horretarako baimena eskatuko beharko zutela parrokiaren bidez adieraztea erabaki zuten.
• 1715-9-1. Udalak parrokiko erretoreari ondorengo oharra zabaltzea eskatu zion: herriari buruzko agiriak zituztenek zortzi egunen buruan itzuli beharko zituztela, herria prest baitzen eskomiku bat ekartzeko.
• 1715-5-24. Enparango errotariak jakinarazi zuen Amuko bidea konpontzen eginiko denboraldian bederatzi egun eta erdi geldirik egon behar izan zuela errotak, galdu zuena ordaintzeko eskatuz. Horrela egitea erabaki zuten.
• 1715-5-17. Maiatzaren 20an Loiolako bidearen konponketa hastea erabaki zuten. Langileei eguerdiko janaria emango zieten, libra erdi haragi eta libra bat ogi. Lehen konponketak Perdillegi baserriaren inguruan egin zituzten, nahiko gaizki zegoelako.
• 1715-3-5. Lehen astean, Perdillegi bitarteko bidea konpontzea erabaki zuten; ondoren, Loiolara bitartekoarekin gauza bera egin zuten.
• 1715-2-18. Pedro Beltran Oiarzabali bere harrobietan 200 gurdi harri ateratzea eskatzea erabaki zuten, beharrekoenak ziren bideak egokitzeko.
• 1715-2-10. Urrestillako Goardia zubia konpontzeko neurriak hartu zituzten.
• 1714-10-5. Iraileko Andre Mariaren ondorengo eguneko zortziak bitartean garoa ebakitzea debekatu zuten, kalteak sortzen zirelako horrela ez egitean.
• 1714-9-8. San Inaziori herriak eginiko botoari buruz idatzi zuen Iruñeko apezpikuak. Probintziaren aldetik eskatu zitzaion konfirmatzea, eta horrela egin zuela adierazi zuen.
• 1714-8-26. Olazko ermitan konponketa lanak egitea erabaki zuten, benetan gaizki baitzegoen. Horretarako, bertako serorak eskainitako dotearen berri jakitea erabaki zuten.
• 1714-6-15. Pedro Martin Goikoa margolariak Urrestillako parrokirako egindako margoak egokitzat hartu zituzten. Erabaki hori Joseph Loza margolariak eta Juan Apaeztegi arkitektuak ikusi ondoren hartu zuten.
• 1714-4-13. Madalena ermitan konponketa lanak egiteko herriak egurra ematea erabaki zuen.